Nú birtir yfir Árbakkaliðinu; hestarnir eru að komast í þjálfun aftur og veikindin í rénum.  Eftir nokkurra vikna girðingarvinnu og fleiri tengd verkefni er byrjað að þjálfa hestana aftur og nokkur hross mæta í kynbótadóm í næstu viku.

Já, hér er búið að skipta upp 90 hekara hólfi í nokkur smærri, fjölga hentugum viðrunarhólfum hér heima við bæ, verið er að vinna upp 20  hektara nýtt tún til heyskapar og verið er að klæða að innan minni skemmuna okkar sem við nýtum sem spónageymslu, hringteymingaraðstöðu og fyljunaraðstöðu á sumrin þegar við erum að nota  hestana á húsi.  Allt verkefni sem frábært er að klára og gaman að sjá nýja og glæsilega hluti.  Enn eru eftir nokkrir trjáflutningar og er áætlað að reyna að komast í það seinna í þessari viku.  Gaman, gaman allt saman!

En fyrir mestu er að nú eru hestarnir að komast í lag.  Þjálfun hefur farið rólega af stað, að öllu er farið með gát til að reyna að komast hjá því að hrossum slái niður.  Þrír hestar hóstuðu aftur einu sinni hver og fengu þeir viðbótarfrí en eru einnig að komast í gang aftur.  Ef svo heldur áfram verður allt komið á fullan skrið í næstu viku.  Við höfum ákveðið að sýna ekki stóðhestana Straum frá Breiðholti og Héðinn frá Feti í kynbótadómi þetta árið þar sem þeir hafa verið í þjálfunarfríi í 8 vikur vegna hóstans.  Þeir eru löngu orðnir frískir en eru önnum kafnir við að sinna hryssum.  Og af þvi að ekkert verður Landsmótið finnst okkur ekki liggja lífið á með þá kumpána.  Nokkrar hryssur verða sýndar, bæði í eigu búsins sem og aðkomuhryssur.  Sumar núna um mánaðarmótin, aðrar eftir mánuð.

Á myndunum með, eru Jón og Hinni að girða, Hinni, einu sinni sem oftar truflaður af símanum.  Að neðan er Jón að  hvíla sig, Hinni að setja bensín á sláttutraktorinn og Hulda að koma úr reiðtúr af Kjuða sínum.

Bensín sett á sláttutraktorinn, Mimi og Hinni

Stund á milli stríða, Jón tyllir sér niður

Hulda kemur úr reiðtúr á Kjuða sínum