Árið 1994 var heldur betur viðburðaríkt.  Haustið 1993 keyptum við hinn landsþekkta gæðing Gými frá Vindheimum undan Sval frá Glæsibæ og Skjónu frá Vindheimum.  Gýmir hafði 1990 verið í öðru sæti á eftir Muna á Landsmóti 1990 og sigraði A flokk gæðinga á Fjórðungsmóti 1991, þá einungis 7 vetra gamall.  Gýmir var sigurkandídat fyrir LM1994 og þangað var stefnan tekin.

Gýmir sigraði svo úrtökuna í Fáki með glæsibrag og kom svo á Landsmót og átti glæsilega forkeppni og stóð langefstur.  Lengra þarf ekki að rekja þá sögu, það muna flestir eftir því hörmulega slysi þegar Gýmir greip á sig og fór úr kjúkuliði.  Sams konar slys hafði ekki átt sér stað á Íslandi áður, svo vitað sé en gerist oft á brokk og stökkbrautum erlendis.  Þetta var sorgarsaga sem ekki verður rifjuð frekar upp hér.

Gýmir var stórbrotinn gæðingur á allan hátt.  Ennþá er miðað við hann þegar talað er um bestu A flokks hesta allra tíma.  Hann var mikið viljugur, vildi ekkert kjass eða knús en þótti gaman að vinna.  Hann er heygður í brekkunni vestan megin við félagsheimili Fáks, með leyfi þáverandi stjórnar Fáks. 

En það gerðist margt fleira þetta ár.  Óður komst í okkar eigu og fékk fyrir hæfileika 8.70 5 vetra gamall sem þá var hæsta hæfileikaeinkunn sem 5 vetra stóðhestur hafði fengið ásamt því að Kjarval frá Sauðárkróki hafði líka fengið sömu einkunn.  Óður var svo sýndur á Landsmótinu og vakti þar mikla athygli.  Hann kemur meira við sögu seinna.  Óður er eins og jú margir vita undan Stíg frá Kjartansstöðum og Ósk Ófeigsdóttur frá Brún.

Hulda komst í fyrsta skipti inn á Landsmót með því að vinna sér sæti á gæðingsklárhryssunni Hrafntinnu frá Núpi í tölti.  Hrafntinna var svo seld Augusti Beyer og endaði í dótakassanum hans.  Hún hefur verið að skila flottum klárhrossum, m.a. Óðssyni sem heitir Hróður frá Reykjavík og er í Danmörku, dæmdur með 9 fyrir tölt og fyrstu verðlaun.

Stefnir frá Tunguhálsi byrjaði á þessu ári að gera sig gildandi, komst í B úrslit á Íslandsmóti í fimmgangi, sigraði þau og vann sig upp í fjórða sæti í fimmgangi.

Og á Norðurlandamóti í Finnlandi í ágúst sigruðu Hinrik og Eitill frá Akureyri gæðingaskeið, 250m skeið og urðu samanlagðir sigurvegarar auk þess sem þeir urðu í fimmts sæti í fimmgangi.  Semsagt þrefaldur Norðurlandameistari.  Að auki varð hestur í okkar eigu Norðurlandameistari í fjórgangi og tölti, Fleygur frá Hvassafelli með Svein Ragnarsson sem knapa.