Gústi reið á vaðið og gerði sér lítið fyrir og sigraði pollaflokkinn á Óðni sínum frá Gufunesi.  Þeir töltu glæsilega um Brekkuvöllinn, Gústi og Óðinn ásamt öllum hinum pollunum og það var stolt afmælisbarn sem tók við verðlaununum sínum í kulda og trekki.  Í öðru sæti var svo hin efnilega 5 ára Rúna Tómasdóttir á honum Glugga sínum frá Grenstanga.

Þá var komið að Eddu.  Barnaflokkurinn er feikna sterkur í Fáki og þrátt fyrir að nokkur góð frá í fyrra séu nú farin upp í unglingaflokk var hart barist.  Edda Hrund reið  höfðingjanum Snæfaxa frá Selfossi en þau gerðu einmitt góða ferð á LM 2004 á Hellu í fyrra.  Hún sigraði Barnaflokkinn núna.  Í öðru sæti varð svo Ragnar Tómasson jr, stóri bróðir Rúnu sem keppti við Gústa í pollaflokknum, á Straumi frá Sauðárkróki.

Svo var komið að mömmunni en hún reið í atvinnumannaflokknum og sigraði hann á Glæsi frá Ytri-Hofdölum.  Þar var það Alexander Hrafnkelsson á Gutta Pet sem varð í öðru sæti. 

Að auki stóðu ýmsir nemendur Huldu sig vel í keppninni og nældu sér í medalíur svo dagurinn var heldur betur fínn, þrátt fyrir skafrenning og kulda.

Þar á eftir lá leiðin heim þar sem bekkjarfélagar Gústa komu í afmæli og gæddu sér á heimagerðri pizzu og fótboltaköku.  "Lukkudagur" sagði Gústi stoltur.

Hér á síðunni eru myndir af öllum knöpunum á viðkomandi hestum teknar við ýmis tækifæri á síðasta ári.

Nánari úrslit má finna á www.fakur.is.